Ögmundur ákveði sín næstu skref

Rétt er það að það er Alþingis að ákveða næstu skref í þessu máli. Það gildir einu hvort ákveðið er að kjósa að nýju, skipa þingið eða hætta við.

Það er hinsvegar óþolandi að innanríkisráðherra skuli lítilsvirða kosningarétt íslendinga með orðum sínum undanfarið. Kosningarétturinn er heilagur og um framkvæmd kosninga til Alþingis gilda reglur sem fara þarf eftir. Alþingi ákvað að kjósa skyldi samkvæmt reglum um Alþingiskosningar og eftir því skal fara.

Af hverju skyldi standa í þeim reglum hvernig kjörklefar skulu vera? Af hverju skildi standa hvernig kjörseðill skuli brotinn saman? Af hverju eru þessar reglur yfirleitt? Það er vegna þess að um framkvæmd kosninga á að vera sátt. Um kosningaréttinn á ekki að þurfa að deila og allir eru sammála um að einstaklingar eiga að fá að kjósa í einrúmi.

Fráleitt er að halda því fram að í lagi sé að sniðganga þessar reglur vegna þess að ekki sannist það hefði haft áhrif á niðurstöðuna. Niðurstaða Hæstaréttar snýst ekkert um niðurstöðu kosninganna. Þetta snýst um virðingu fyrir kosningaréttinum og framkvæmd kosninga.

Innanríkisráðherrann fer fremstur í flokki manna sem finnst greinilega í lagi að lítilsvirða kosningaréttinn með þessum hætti.

Ögmundur ætti að íhuga vandlega sín næstu skref í pólitík.

Alþingis að ákveða næstu skref